Te haerenga a Te Māori ki Amerika 1984-1986

Hero image: Te kara mō te whakairinga toi Te Māori i The Metropolitan Museum of Art, New York. Tohutoro: TZP8386. Tau: 1984. Whakamihi: Te Reo Tātaki o Aotearoa.

I te 10 o Mahuru 1984, ka pōwhiritia te tī me te tā kia eke ki runga i te Metropolitan Museum of Art ki New York. Ko ngā taonga whitiata kei tēnei paewhiri e whakaatu ana i te pōwhiri nui whakaharahara o Te Māori. I roto i te paewhiri nei ka kitea te iti me te rahi o te iwi Māori e whakaneinei ana kia tau ngā taonga puipuiaki ki roto i te whare taonga.

I tīmata te tāpoi o Te Māori ki te Āporo Nui, ā, nō ngā tau 1984 – 1986 i haere tāpoi ai ngā taonga huri noa i te whenua o Amerika. Nāwai rā ka iri ake Te Māori ki St Louis, ki San Francisco me Chicago.

I whakakapia te tāpoi ki te Chicago Field Museum i te 8 o Hune 1986. Neke atu i te 621,000 te rahi i tae atu ki te kite i te whakaaturanga.

Nā te angitu o Te Māori ki tāwāhi i piki ake ai te mana o te toi Māori me tōna wāhi i Aotearoa.

Kaleidoscope: Te Māori

I tēnei kaponga o Kaleidoscope i te tau 1984, ka whakaaturia te whakatuwheratanga o Te Māori ki te MET.

Ko ngā waha pūkōrero ko Tā James Henare, ko Win Cochrane (NZ Cultural Ambassador), ko Roland Force (Director, Indian Museum) rātou ko Tā Hirini Moko Mead.

Koha: Te Māori, he kupu korowai

I tēnei hōtaka o Koha i te tau 1984, ka whakaaturia te rangapū e whakakanohi ana i te iwi Māori i te whakataunga o ngā taonga ki te Met.

Ka tīmata ki ngā karakia nā Sonny Waru (Taranaki) i takitaki. Kātahi ka tū ake te Heamana o te NY Met, a J. Richardson Dilworth, hei wahapū mō te mana whakahaere ki te mihi ki te kaupapa, ki ngā taonga puipuiaki me te iwi Māori. I riro a Tā James Henare hei māngai mō te iwi Māori nui tonu.

Nā Koro Wetere, te Minita Take Māori i tōna wā, ngā kōrero whakakapi. Kātahi ka karakia a James Henare ki mua i te aroaro o Uenuku, tērā taonga matahīapo o Tainui waka. Hei whakakōpani i te kaupapa, ka tū ngā kapa haka ki te whakangahau ki te waiata.

Te Māori: He uiui ki a Peter Jemison rāua ko John Kaaho i te NY Met

I tēnei hōtaka o Koha nō te tau 1984, ka uiui a Hōne Tuwhare i te māngai taketake a Peter Jemison (Heron Clan, Seneca Nation). Ka whakawhiti kōrero rāua mō ngā tairitenga o te iwi Seneca me te iwi Māori i kitea e Peter i roto i ngā taonga o Te Māori.

Ka uiuia a John Kaaho, he uri nō Tūhoe e noho ana ki New York. Ko tana tūranga mahi i reira hei manu tūtei ki te Met i te whakairinga o Te Māori ki te tiaki i ngā whakairinga toi.

He pāhotanga o te whakakapinga a Te Māori 1986 - Chicago Field Museum

He pāpāhotanga irirangi tēnei i te Chicago Field Museum nō te tau 1986, i te pō whakamutunga o te tāpoi i Amerika. Ko Kara Puketapu (Te Āti Awa) tēnei e mihi ana ki ngā kaitautoko o te kaupapa tae noa ki te tahua matua a Mobil me ngā ringa hāpai o ngā whare taonga o Amerika.

Koha: Te whakapinga a Te Māori 1986, Chicago Field Museum

I kapohia tēnei hōtaka o Koha i te tau 1986. Ka whakaaturia te whakakapinga o te tāpoi nui, a Te Māori, i Amerika.

I te hōtaka nei, ka whakawhiti kōrero a Kara Puketapu (Te Āti Awa) ki ētahi o ngā kaimanaaki taonga nō Amerika. Ka uiuia a Jane Tai nō The American Federation of Arts, nā tā rātou mahi whakarite i tū ai tēnei whakaaturanga toi.

Ka whakakapi a Hēnare Tūwhāngai i te kaupapa ki ana whakamahuki o te whakaaturanga.