Te hokinga mai 1986-1987

Hero image: Ko Bessie Walters rāua ko Mere Bereton, ngā kaiārahi i National Museum of New Zealand, Te Whanganui-a-Tara 1986. Tohutoro: TZP104532. Tau: 1986. Whakamihi: Te Reo Tātaki o Aotearoa.

Nā te angitu o te tāpoi haere o Te Māori ki Amerika i tau ai te whakaaro kia iri ake rā anō ngā taonga, kia whakaaturia anō ki roto i ngā whare taonga o Aotearoa.

I te marama o Ākuhata 1985 i tīmata ai ngā whakaritenga mō te tāpoi o Te Māori i Aotearoa. He komiti whakahaere i whakatūria hei whakarite i te whakaroanga o ngā whakaataenga taurewa taonga me te kōwhiri i ngā whare ki reira iri ai ngā taonga.

I oho anō te mauri o te kaupapa me tōna tapahanga hou. Nā, ka rokohanga ko Te Hokinga Mai i whakaeke nei.  Ka taka ngā marama, ka tāpoi, ka hōrapa i te motu, ā, ka whai wāhi te whakairinga toi nei ki te National Museum i Pōneke, ki te Otago Museum, ki Robert Dougall Art Gallery i Ōtautahi me te Auckland Art Gallery i Tāmaki Makaurau. Neke atu i te 917,500 te rahi i kite i te whakairinga toi.

He pāhotanga mataora o te tuwheratanga a Te Māori – National Museum, Wellington

He pāpāho irirangi tēnei, ko Hēnare Te Ua e whakapāho ana i te pōwhiri ki Pukeahu i te whakatuwheratanga o Te Māori ki te National Museum i Pōneke.

Ko Te Āti Awa tērā e pōwhiri ana i ngā taonga me ngā iwi o te motu kia ao ake mai rā ko Te Hokinga Mai. Kei tēnei puranga oro hoki ngā pūkōrero a Pumi Taituha rāua ko Pateriki Rei.

Koha: Te whakatuwheratanga a Te Māori 1987 – Auckland Art Gallery

Kei tēnei hōtaka o Koha nō te tau 1987 e whakaaturia ana te whakatuwheratanga o Te Māori i te Auckland Art Gallery. Nā Hēnare Tūwhāngai ngā iwi i ārahi kia hikina te tapu o te whakairinga. I riro nā ngā iwi o Tāmaki ki te Raki ngā taonga i manaaki mō ngā wiki e rua i whai ake.

He huinga pūkōrero kei te hōtaka, ko  Mōnita Delamere, ko Kahurangi Whina Cooper rātou ko Huirangi Waikerepuru e kōrero ana ki te mana me te wehi o ngā taonga, me te pūāwaitanga o te tuakiri Māori.

Te Kura o Waikaremoana e toro atu ana i Te Māori 1986

He taonga whitiāhua tēnei nō te kohikohinga o Te Reo Tātaki o Aotearoa i te tau 1986. E whakaaturia ana Te Kura o Waikaremoana e tirotiro haere ana ki ngā taonga i iri nei i Te Māori.

Spot on: Kaiārahi o Te Māori – Suzanne Paki

Ko te hōtaka o Spot On tēnei nō te tau 1986. E whakaaturia ana te whakairinga toi, a Te Māori, i te National Museum i Te Whanganui-a-Tara. I tēnei kaponga, nā Suzanne Paki, he kaiārahi o te whakairinga, i whakawaha atu ngā kōrero tuku iho o ētehi whakairo i Te Māori.

Te poroaki a Ngāi Tahu iwi i Te Māori 1987

I tēnei hōtaka o Te Karere nō te tau 1986, ka poroporoāki a Ngāi Tahu ki te whakairinga toi, a Te Māori, i mua tonu i tana wehenga atu ki te Auckland Art Gallery. 

Te whakakapinga a Te Māori – te poroporoaki

He taonga whitiāhua tēnei nō te tau 1987, i te whakakapinga o Te Māori. Ko Hone Kaa te reo tātaki, ka matapaki i ngā hua i puta ai me ngā akoranga i mau ai nō te iringa o Te Māori.

Kei roto hoki i tēnei whitiata ko te reo o ngā kaiārahi o Te Māori e kōrero ana mō ā rātou mahi i ngā whare taonga hei manaaki taonga, hei manaaki manuhiri.

Ka tuwhera ake te poroporoāki i a Tāmati Reedy, te māngai mō te Komiti o te Māori, me ana mihi ki te hunga nā rātou te kaupapa i tautoko. Koia ka mihia ko Te Arikinui Te Atairangi Kaahu, ko ngā mema o te Karauna me te Kāwana, tae noa ki ngā tahua o Mobil me Air New Zealand kia ao ake rā Te Māori.

Ka tukuna he karakia whakamutunga e te Pīhopa o Aotearoa hei whakamoe i ngā taonga me te kaupapa o Te Māori.