Te Awe Kōtuku ki Ngā Taonga

E harikoa ana a Ngā Taonga kua whiwhi pūtea ia i te kaupapa Māturanga Māori a Te Awe Kōtuku nā te Manatū Taonga. Mā te pūtea nei e kōkiri ai a Ngā Taonga i ngā kaupapa nui e toru kia ora ai ētehi Mātauranga Māori e noho tata korehāhā ana.

Mā Te Awe Kōtuku whānui tonu ngā kaupapa tekau mā waru e haupū hei tautoko i te iwi Māori kia tiakina ai ōna mātauranga kua pēhi nei e te mate Karauna, pēhi ā-hapori, pēhi ā-moni hoki. Mā Ngā Taonga ngā kaupapa motuhake e toru e mahi kia rokirokitia ai, kia kōrerotia ngā taonga Māori ataata-rongo. Koinei ngā kaupapa:

Ko te Rokiroki me te Whakamatihiko i te Hōtaka o Tangata Whenua

Mā Ngā Taonga e rokiroki ai, e whakamatihiko ai, e whakamārama hoki ai i te hōtaka whakaharahara, e ono ōna putanga, arā ko Tangata Whenua (1974). Ka rokirokitia hoki ngā whitiāhua kāore i whai wāhi ki te hōtaka. Ka mahi tahi tēnei kaupapa i te taha o ngā kaitiaki, ngā whānau, ngā hapū, ngā iwi hoki e tika ana.

Ngā Tohu Mātauranga Taketake ki Ngā Taonga a te Iwi (hei tauira)

Kua piri tahi a Ngā Taonga me Te Whakatōhea (nō te rāwhiti o Te Moana-a-Toi). Mā Te Whakatōhea e whakarite tētahi kaupapa e tāngia ai ā rātou taonga kei Ngā Taonga me ētehi atu whare taonga ki te Tohu Mātauranga Taketake. Kua whakamanatia ngā tohu Mātauranga Taketake e te ao whānui, māna ngā iwi taketake e āwhina ki te tiaki i ō rātou mana whakairo hinengaro, māna e tika ai, e nui ai ngā kōrero mō te taonga, ā, māna hoki ngā taonga me ōna mātauranga e tika ai te whāwhā me te whakamahi.

Ngā Wānanga Whakamatihiko i ngā Taonga Ataata-Rongo a te Iwi.

Mā te kaupapa whakamatihiko nei e ora ai ngā taonga ataata-rongo kei te iwi, arā ngā tēpe me ngā whitiāhua e ngoikore haere ana. Mā Ngā Taonga e whakarite mīhini i ētehi iwi puta noa i te motu. Māna hoki e whakaako te iwi ki te whakamahi i aua mīhini kia rokirokitia ai ā rātou ake mātauranga ataata-rongo.

Ko ērā atu tari kua whai wāhi ki tēnei Kaupapa, ko Mātauranga Māori Te Awe Kōtuku, ko Toi Aotearoa, ko Te Pouhere Taonga, ko Manatū Taonga, ko Te Matatini, ko Te Papa Tongarewa, ko Te Puni Kōkiri me Te Tari Taiwhenua. E ngākau nui ana a Ngā Taongo ki te mahi tahi.

Mō ētehi atu kōrero mō Te Awe Kōtuku, tēnā whakapā atu ki a Paul Meredith ki te īmēra – paulmeredith@ngataonga.org.nz, ki tana nama waea rānei – 027 386 9186.

Hero image: Te Kāmata Kura. (Bernard Makoare)