E whakanui ana i te 40 tau o Te Māori

Hero image: Ko te pōwhiri o te whakairinga toi, a Te Māori. Metropolitan Museum of Art, New York, 10 Mahuru 1984. Tohutoro: TZP8386. Tau: 1984. Whakamihi: Te Reo Tātaki o Aotearoa. Sonny Waru.

I te 10 o Mahuru i te tau 1984, ka tū te whakapuaretanga tuatahi o Te Māori ki New York i te Metropolitan Museum of Art. 174 katoa ngā taonga nō ngā puni tiaki taonga o Aotearoa i whakairihia mō te kaupapa, me te aha i whai wāhi atu ai a Ngāi Māori ki roto i ngā whakaritenga, ki te whakairi i ngā taonga ki tāwāhi.

Neke atu i te ngahuru tau ngā mahi whakariterite kia whakarewaina Te Māori ki te ao - inā rawa te nui o ngā takatū me ngā whakawhitiwhiti kōrero kia hua mai te kaupapa. Ko te ohonga ake o ngā taonga matahiapo ki te ao, he kura wiwini, he kura wawana.

Nō ngā tau 1984 – 1986 i haere tāpoi ai ngā taonga huri noa i te whenua o Amerika. Nāwai rā ka iri ake Te Māori ki St Louis, ki San Francisco me Chicago. Ka whakahokia a Te Māori ki Aotearoa me tōna tapahanga hou. Nā, ka rokohanga te whakaekenga o Te Hokinga Mai. Ka hōrapa i te motu, ā, ka whai wāhi te whakairinga toi taioreore nei ki Pōneke, ki Ōtākou, ki Ōtautahi me Tāmaki Makaurau.

Ka eke te whakaaturanga ki taumata kē atu, ā, nā Te Māori i pupū ake te kaiora me te hatete o te ahurea Māori. 1.5 miriona katoa ngā manuhiri i toro atu ki te whakaaturanga i tāwāhi me Aotearoa. Nā te whakakitenga nei i oho ake ai ngā whare taonga ki ngā kōrero a ngā iwi mō ā rātou taonga. Nā whai anō he kitenga hou i ao ake i roto i ngā whare taonga, me pēhea e whakaatu i ngā taonga a te Māori.

Hei whakatairanga i te 40 tau o Te Māori, e whakahoahoatia ana e Te Māori Manaaki Taonga Trust me Ngā Taonga Sound and Vision, te kohinga taonga ā-ipurangi nei hei whakanui i te ihi, i te wehi, i te wana me te tapu o tēnei whakaaturanga hirahira rawa, a Te Māori.

E mihi ana a Ngā Taonga ki Te Māori Manaaki Taonga Trust, ki ngā kaitiaki me ngā kaipupuri mōtika, mō koutou i whakawātea mai i ēnei taonga.

Tēnā, kia tūhuratia te kohinga taonga.