3 Aug 2017 Te Kāea
I whara tētehi tangata i te porotēhe i Ka Hale o ka Lā i Hawai’i. E porotēhetia ana te karu tata nunui. Ko Mahealani Ahia tētehi kaikōrero.
E pātai ana ngā kaiārahi ā-iwi, he aha te take kāre i tohua e Reipa he Māori ki ngā tūranga kaiārahi i mua noa atu. Ko te angitū kore nei o te tono a te mema o Hauraki-Waikato, a Nanaia Mahuta mō te tūranga kaiārahi tuarua i te tau rua mano tekau mā whā e kōrerotia ake nei.
Hei tā Toby Curtis, "Ahakoa wāku mihi ki a Kelvin. Kei te pai tērā, engari ka titiro ki wāna hoa Pākeha katoa, nā reira ko tāku titiro, he aha ai rātou i kore whakatūngia hoki a Nanaia, i tōna wā.”
Ko tā Ngahiwi Tomoana, "Pai mōna, pai mō Te Pāti, engari me mahi ēnei momo mahi mai rā anō, mai i rā anō nā te mea, ko te tokomaha o Māori e tautoko ana ki a Reipa.”
Hei tā Nanaia Mahuta, "Kua hipa te wā māku, i tarai, kāore i toa, e pai ana kua puta mai a Kelvin hei tuarua.”
Nō te wiki nei i kōwhiria a Kelvin Davis hei tuarua mō te kaiārahi hou a Jacinda Adern.
Ko ia te kaituhi Māori tuatahi ki te whakaputa pukapuka o ētahi pūrākau poto, pukapuka pūrākau roa hoki.
He tohu anō ka tuia ki te tātua o Witi Ihimaera, arā, ko te Tohu a te Pirimia mō Ngā Whakatutukinga ā-Tuhi.
Tekau mā ono ngā pukapuka, e whitu ngā kohikohinga pakiwaitara, e whā ngā kiriata, e toru ngā whakaari ā Witi Ihimaera.
Tā Ihimaera o Te Aitanga-a-Māhaki, Rongowhakaata, Te Whānau-a-Kai me Ngāti Porou, "E mea ana ētahi, ehara i te mea me nui te kōrero, ko te kaupapa kē te mea nui."
"Koia pea tēnei te tuatahi, engari mēnā kāhore e pai ana tērā. Ēngari mēnā ko ia te tuatahi, he tauira pea tēnei mō te ao tuhituhi e haere ake nei."
Ka tū te kaupapa tuku taonga nei ki Te Whanganui-a-Tara.
E rangahaua ana e Rebecca Kibble te noho a te Māori ki te taone. Kei Te Whanganui-a-Tara ana mahi.
Kua hoki a Phoenix Karaka ki tana kapa o mua ki ngā Mystiks.
Hei ngā rangi whakatā nei ka hoki atu te whakataetae mamau nui rawa o Aotearoa.
Ka tae atu ngā kaiwhakataetae mai i ngā tōpito katoa o te motu ki taua whakataetae i Tāmakimakaurau.
Ko te matapae o te kaiwhakahaere a Steven Oliver, inā te tokomaha o ngā Māori ka uru atu ki te kaupapa.
E ai ki ngā kaiwhakahaere, ko te nuinga he Māori.
He pītau whakarei i te ao umanga, kua whiwhi e Rachel Taulelei i te karahipi a te Pirimia mō ngā kaihautū pakihi.
Ko ia te tumu o Kono, he pakihi Māori, kei te rōpū kotahi rau o runga i Aotearoa mō wā rātau mahi kai, inu hoki.
Hei tāna, e ngākaunui ana ia ki te mahi pakihi. Ko ia te tumu o Kono, he kamupene mahi kai, mahi inu hoki ki raro i te Koporeihana o Wakatū.
Hei tā Rachel Taulelei anō, ruarua noa iho ngā wāhine kei ngā tūranga teitei o te ao pakihi, me te aha, kei te pīrangi ia kia tū hei tauira.
[ka ngaro pea he kaupapa hākinakina]
[i tangohia mai ēnei kōrero i te ipurangi o Whaakata Māori, i ētitangia hoki]