Ki tā te Ope Patu Ahi, ehara nā te ringa nanakia te weranga o te marae o Tapu Te Ranga i te ata o te Rātapu. I hangaia tēnei whare i ngā tau whitu tekau, hei tūrangawaewae mō te hunga kore whare. Kua tīmata kē nga whakawhitinga kōrero me te kāwanatanga mō te hanga whare hou. Karere: Tema Hemi. Gabriel Tupou, Māngai, Tapu Te Ranga. Nanaia Mahuta, Minita Tuarua i Ngā Take Whare. Paul Eagle, Mema pāremata, Rongotai. Peter Fox, Te Ope Patu Ahi o Aotearoa.
Kua whakapuakitia e Rererangi Aotearoa ētahi panonitanga e āhei ai ngā kaimahi ki te whakaatu i ō rātou moko i te wā mahi. I hua mai ngā panonitanga nei nā te matekiri o ētahi ki tā rātou ture. Hei te Hepetema ka whakamana.
Kei te rongo ngā tauira Māori me ō rātou whānau i te ngau o te kaikiri, o te makihuhunu. Ko tērā te nawe kua tukuna e ngā whānau ki te Tāhuhu o te Mātauranga. Kua whakamānuhia e te kāwanatanga he hōtaka hou hei whakakōrero i ēnei take i te pūnaha mātauranga, ko Te Hurihanganui, he mea hei tāpiri atu ki te mātauranga ako o Te Kotahitanga. Bianca Elkington, Te Puna Mātauranga, Ngāti Toa. Kelvin Davis, Minita Takirua i Ngā Take Mātauranga.
Ko Manawatū he rauemi mariko i waihangatia i raro i te hōtaka $1.9 miriona tāra nā te Tāhuhu o te Mātauranga hei whakamāmā i te torotanga atu ki ngā rauemi reo Māori kounga. He mea waihanga mō ngā kura Māori me ngā kura reo rua.
Ki tā Chris Huriwai, he tangata whakahē nui i ngā mahi pāmu kau, ehara ō tātou tīpuna i te hunga inu miraka kau. Heoi anō ki tā Chris, ko te pāmu kau he mea whakakino i te whenua. Karere: D’Angelo Martin. Chris Huriwai, Kaiwhakahē, Miraka Kau.
Ko te tino me te mano nō Ngāti Rangi i whakahuihui atu ki runga o Ruapehu ki te whakamana i te wā o Puanga. Koinei te karakia tuatahi mō tēnei tau. Ka tū anō he karakia whakamutunga ki te awa tipua o Whanganui hei te mutunga o te marama. Karere: Regan Paranihi. Che Wilson, Ngāti Rangi.
E tātāhia ana te kaiwhakaari nō Aotearoa a Manu Bennett, mōna i haka tahanga i tētahi wāhi tapu i Romania. Karere: D’Angelo Martin. Brad Totorewa, Ngāti Naho.
Kua tau mai anō tētahi kāhui kaiako, tamariki anō hoki i Hawaii ki Aotearoa. Ko tā rātou kaupapa he torotoro i ngā kura kaupapa Māori e kitea ai ētahi rauemi whakaraoura reo hei whakahoki ki te kāinga. Hei āpōpō noho atu ai te rōpū nei ki te taha o te Wharekura o rākaumanga. Karere: Ruth Smith. Kekailoa Perry, Ke Kula O Ehunuikaimalino. Keli’likanoe Mahi, Ke Kula O Ehunuikaimalino. Hokina Oliver, Ke Kula O Ehunuikaimalino. Dave Thompson, āwhina i te Kaupapa.
Kua pari te ihu o te toki poipātū a Joelle King i tana tukinga tuatahi ki a Camille Serme nō Wīwī i te whakataetae PSA o te ao ki Īhipa.
Hei te mutunga wiki tuki atu ai te kapa Chiefs ki te kapa kei te tūranga tuawaru o te whakataetae Super Rugby, arā ko ngā Rebels. Hei tēnei wiki ka hoki atu te kāpene takirua a Brodie Retallick. Ka tū te kēmu ki Poipiripi. Karere: James Perry. Colin Cooper, Kaiako, Chiefs.
Ko te manu korokī ko Troy Kingi tētahi o nga tautapanga i te wāhanga o Te Waipuna-a-Rangi i ngā tohu o Matariki i tēnei tau. Ka puta mai te kōpae pūoro tuatoru a Kingi a te 13 o tērā marama. Ko Holy Colony Burning Acres te ingoa. Karere: Raniera Harrison. Troy Kingi, Ngāpuhi, Ngāti Pikiao.
Ko Tamatea Kai Ariki ka mahuta mai rā ki te pae.