Ko te iwi o Ngāti Tukorehe, ko Kuku te marae.
E whakamārama mai ana a Sean Ogden i ngā kōrero o tō rātou nei iwi mai i Hawaiki ki tēnei whenua o Aotearoa, ko ngā kōrero mō Tainui waka, heke iho, heke iho.
Ka kōrero mō Tukorehe, ka kaumātuatia, ka noho ia ki te taha o tōna mokopuna a Hinetore, māna ia e manaaki. Ka mate i reira, ka mau atu i a ia ki Maungatautari kia tanu atu ki ngā ana o reira. Ka kōrero mō ngā hekenga mai o Ngāti Raukawa ki te Tonga. Ka wāwāhitia ngā whenua e Waitohi, te tuahine o Te Rauparaha.
Ko ngā kōrero mō Rangiātea, te whare karakia ki Ōtaki. Ka tono a Te Rauparaha ki a Poho Tīraha kia hangahia he whare karakia mō te iwi, ka tono a Poho Tīrahaki a Korongiria, māna e whakarite i ngā karakia ka whakataki.
Nā Patuaka Tauwehe i tārai, nā Waikato tonu i taki i te kawa. I āwhina a Piwiki Horohau ki te tārai i te whare.
E kōrero ana a Gary Wehipeihana mō te haere ki Tirotiro whetū, he nohoanga tawhito o ngā mātua tūpuna o Tukorehe. Kua kī rawa atu i ngā kai i aua rā. He kōrero hoki mō tētehi taniwha, ko Mukukai tōna ingoa. E ai ki ngā kōrero ka kitea a Mukukai, ka nui te kai.
E kōrero ana a Mary Karauti o Ngāti Tukorehe mō ngā mahi a ngā wāhine o te marae. Ko tāna, kāore e waiho te tūpāpaku ko ia anake, i ngā rā o mua, ka tū he tēneti ki te taha o te whare. E kōrero ana a Martin Wehipeihana o Ngāti Tukorehe mō ngā kuia āwhina i te marae, ko ngā tuarā o tēnei marae.
Ko ngā kōrero o Sean mō te āhua o te whare me ētehi o ngā whakairo o roto. E kōrero ana a Taurua Huia mō ngā whakairo o te mahau o te whare.
Ka kōrero ki tētehi rōpū o te whānau me ā rātou mahi ki runga i te marae, mō te marae rānei. Ko Hūhana Smith, ko Lupa Daly ko Tasha Hammond ko Keremihana Heke.
A look at Tukorehe Marae situated in the Ngati Tukorehe tribal area of Kuku, north of Otaki, recounting the tribe's origins and discovering the tribe's current activities and their aspirations.